വാക്കുകൾ

വാക്കുകൾ വന്നെന്റെ വാതിലിൽ
ഊക്കോടെമുട്ടിവിളിക്കവെ
തുറക്കാതിരിക്കുവാനാകുമോ ?
വാസ്തവാഗ്നി പടർന്നുകയറവെ
തീ പിടിക്കുന്നവാക്കുകൾതൊണ്ടയിൽ
കുടുങ്ങിക്കുരുങ്ങിയൊരു
നോവായവശേഷിക്കെ,
തുറക്കാതിരിക്കുവാനാകുമോ വാതിലുകൾ?
മൗനനൊമ്പരമൊരു
നിവേദ്യമായ് മാറവെ
പുസ്തകങ്ങൾ ജനവാതിലുകൾ
തുറക്കാതിരിക്കുവാനാകുമോ
നൊമ്പരംകൊള്ളുന്നോർക്കായ്
ഒരിടമെൻകരളിൽകരുതവെ
പീതപുഷ്പങ്ങൾ നിറഞ്ഞ് ചിലങ്ക-
യണിയുകയാണെൻ കരുണാര്‍ദ്രഹൃത്തടം!
വഴിതെറ്റിയെത്തും ഋതുക്കൾ
കുമ്പസാരക്കൂട്ടിലവതൻ രഹസ്യങ്ങൾ
വിവരിക്കവെ, കണ്ണു നിറഞ്ഞു പോകുന്നുവോ
വാക്കുകൾ വന്നെന്റെ തന്ത്രിയിൽ
അന്ത്യചലനത്തിന്റെ ദുരൂഹതകൾ
വെളിപ്പെടുത്തവെ, ആരോവന്നെന്റെ
ഭൂമിയുടെ വേരുകൾ പിഴുതെറിയുന്നു
വാക്കുകൾ വന്നൂക്കോടെ മുട്ടുന്നു
തുറക്കാതിരിക്കുവാനാകുമോ വാതിലുകൾ?