ഞാനുറങ്ങാതിരിയ്ക്കട്ടെ

മാറ്റുവാനായെന്റെ
കുപ്പായമോമനേ…
പിഞ്ഞിയിതൊക്കെയും
പ്രാകൃതനായ പോൽ.
മുമ്പു നാമൊന്നിച്ചു
കണ്ട കിനാവുകൾ
മുന്തിരിത്തോട്ടം
നിറഞ്ഞ നിലാവുകൾ
മൂകത ഭേദിച്ചു നീ ചൊന്ന
പ്രണയോക്തികൾ
ഒക്കെയുമോർമ്മിച്ചിരിയ്ക്കെയീ-
യേകാന്ത നിർജ്ജീവ രാവി-
ലുറക്കമില്ലായ്മകൾ.
ഒറ്റമുറിയിലെ താന്തരാം
കൂട്ടുകാരൊക്കെയുറക്കമായ്,
കൂർക്കം വലിയുടെ
ദീർഘമാം വൈഖരി
തമ്മിൽ പിണങ്ങി പലേ
വിധ താളമേളങ്ങളിൽ,
താനേ തളർന്നു ഞാൻ
ചിന്തകൾ തീർത്ത തടവറ-
യ്ക്കുള്ളിൽ നിശ്ശബ്ദനായ്‌,
ആരോരുമറിയാതെ-
യറിയാതെയോമനേ….
നിശാഗന്ധികൾ പൂത്തു
വിടരുന്ന ത്രിയാമമായ്,
കരിമ്പടച്ചൂടിൽ തണുപ്പിന്റെ
തീഷ്ണത പൂഴ്ത്തിയൊരു ദിന
ദേഹാലസ്യങ്ങളിറക്കി
വച്ചെല്ലാം മറന്ന പോൽ,
നീയുറങ്ങിക്കഴിഞ്ഞിരിയ്‌ക്കാം.
മമ സഖീ മൗനം കുടിച്ചു ഞാൻ,
മാഞ്ഞു പോം മായിക
ജീവിത തപ്തമാം
ദൂര വിഭ്രാന്തിയിൽ.
നീയുറങ്ങിയിരിയ്ക്കാം
നീയുറങ്ങുക,സഖീ…
ഞാനുറങ്ങാതിരിയ്ക്കട്ടെ!