ചേതസ്സ് സത്യമേവ ജയതേ നാനൃതം
ഒരു ദിവസം ദേശത്തെ കണക്കു ബോധിപ്പിക്കാൻ അംശം മേനോൻ മനക്കലെത്തി , തമ്പുരാനെ കാണണം എന്ന് ആഗ്രഹം പറഞ്ഞു .
“ തമ്പുരാൻ മേനോനെ കാത്തിരിക്കുന്നു , മുകളിലുണ്ട് ”
“ ശരി തമ്പുരാട്ടി ”
മുകളിലെ തൻ്റെ മുറിയിൽ അഞ്ചാം തമ്പുരാൻ വിശ്രമിക്കുന്നു. മേനോനെ കണ്ടതും തമ്പുരാൻ പ്രസന്നനായി .
” ഞാൻ മേനോനെ കാത്തിരിക്കുകയായിരുന്നു ”
മേനോൻ കണക്കുവഹകളൊക്കെ തമ്പുരാന്റെ മുന്നിൽ ഹാജരാക്കി
” ഇതിനല്ല മേനോനെ ഞാൻ തന്നെ കാത്തിരുന്നേ !!!!!!!!!! ”
” പിന്നെ എന്തിനാ അങ്ങുന്നേ ”
” എനിക്കൊരാഗ്രഹം , ഒരു കഥകളി കാണാൻ ”
“ അതിനെന്താ തമ്പ്രാ , തെക്കൻ കാവിൽ കളിയുണ്ടെന്ന് വരുമ്പോൾ ചെണ്ടകൊട്ടി അറിയിക്കുന്നത് കേട്ടു !”
” എന്നാ മേനോനെ നമ്മുക്കൊന്ന് പോയാലോ ? …. ”
” അങ്ങയുടെ ആഗ്രഹം പോലെ ”
അഞ്ചമ്പ്രാൻ പല്ലക്കിലും മേനോൻ തൻ്റെ കുതിരപ്പുറത്തും തെക്കൻ കവിലേക്ക് യാത്ര തിരിച്ചു . രണ്ടു ദേശം കടക്കണം തെക്കൻകാവ് എത്താൻ. പോണവഴിക്കു വിശ്രമിക്കാൻ നിന്നപ്പോൾ അഞ്ചമ്പ്രാൻ ചോദിച്ചു
” എന്താ മേനോനെ കഥ ? ”
” കുചേലവൃത്തം ”
” അതിപ്പോ കേമായിരിക്കണു , കുറേ ദിവസായിട്ട് ന്റെ ഉള്ളില് കൃഷ്ണനാ , ഗുരുവായൂര് പോണെന്ന് നിരീച്ചതാ , തനിക്ക് മുറുക്കാൻ വേണോ ? ”
” അടിയന്റെ കയ്യിൽ ഉണ്ട് ”
” ആരാ കൃഷ്ണൻ കേട്ടണേ ?”
” അങ്ങ് തെക്കുന്നു വന്ന കേളുവാ ”
” ഭലേ !!! ”
അവർ യാത്രതുടർന്നു , ദേശങ്ങളിലേ ഇടവഴികൾ അവരെ വരവേറ്റു , തെക്കൻ കാവിലെത്തിയപ്പോൾ കളിക്കുമുൻപായിട്ടുള്ള കേളികൊട്ട് നടക്കുന്നു . തമ്പുരാന്റെ വരവറിഞ്ഞു എല്ലാവരും അക്ഷമരായി . അദ്ദേഹത്തെ വരവേറ്റു .
‘ കേളുവാണല്ലേ കൃഷ്ണൻ ? ”
” അതെ അങ്ങുന്നേ !!!”
തമ്പുരാൻ അണിയറിലേക്ക് പോയി , കൃഷ്ണ വേഷം മാത്രം കണ്ടില്ല . ഒരു ചുറ്റിക്കാരന് പറഞ്ഞു
” കേളുവാശാൻ പിന്നാപുറത്തെ വരമ്പിലുണ്ട് ”
തമ്പുരാനും മേനോനും പിന്നാപുറത്തേക്ക് പോയി . അവിടെ കൃഷ്ണ വേഷം കള്ളുമോന്തുന്നു . അതും നല്ല അന്തികള്ള് .
തമ്പുരാനെ കണ്ടതും കൃഷ്ണവേഷം ഒന്ന് പരുങ്ങി .
” കൃഷ്ണന് വെണ്ണയല്ലേ പ്രിയം മേനോനെ ? ”
” അതെ ”
കേളുവാശാൻ എന്താ ചെയ്യണ്ടെന്നറിയാതെ നിന്നു . തമ്പുരാൻ തുടർന്നു
“ സാരല്ല്യ , മധുരയിലെ രാജാവല്ലേ ? കുറച്ചൊക്കെ സോമരസം കുടിക്കുന്നതുകൊണ്ട് തെറ്റില്ല ”
കൃഷ്ണവേഷം ചിരിച്ചു , തൊഴുതു . തമ്പുരാനും തൊഴുതു .
കളി കഴിഞ്ഞുപോകുമ്പോൾ തമ്പുരാൻ കേളുവിനെ അടുത്തേക്ക് വിളിച്ചു
” ഗംഭീരം , ഞാൻ അടുത്തിടെ ഇങ്ങനെ ഒരു കൃഷ്ണനേ കണ്ടട്ടില്ല ”
തന്റെ കയ്യിലെ ഒരു സ്വർണ്ണ മോതിരം ആശാന് കൊടുത്തു
“ കേളു കുടിക്കുന്നതുകൊണ്ട് തെറ്റില്ല , അധികമാവരുത് ട്ട്വോ ? നല്ല കഴിവുണ്ട് , അത് കളഞ്ഞുമുടിക്കരുത് ”
കേളു വണങ്ങി
” ഇനി ഉണ്ടാവില്ല തമ്പ്രാൻ “
